Aholi jon boshiga real daromadlarning o‘sishi sekinlashdi

O‘zbekistonda 2023 yilda aholi jon boshiga umumiy daromadlarning real o‘sishi 2,4 foizni tashkil etib, o‘tgan yilga nisbatan sezilarli darajada sekinlashgan. Taqqoslash uchun, bu ko‘rsatkich 2022 yilda 7,3 foiz bo‘lgan. Bu haqda Statistika agentligi hisobotida qayd etilgan.

Agentlikka ko‘ra, o‘tgan yil yakuni bo‘yicha aholining umumiy daromadlari 728,8 trln so‘mni tashkil etgan. Xususan, umumiy daromadlarning nominal o‘sishi 15 foiz, real o‘sish sur’ati 4,6 foiz bo‘lgan.

Aholi jon boshiga umumiy daromadlar 20 mln so‘mni tashkil etgan. 2023 yilda aholi jon boshiga umumiy daromadlar hajmi Toshkent shahrida (44 427 900 so‘m) va Navoiy (31 445 600 so‘m), Buxoro (23 480 300 so‘m), Toshkent (20 730 200 so‘m) hamda Xorazm (20 076 600 so‘m) viloyatlarida o‘rtacha respublika darajasidan yuqori ko‘rsatkichlarda qayd etilgan.

Eng quyi ko‘rsatkichlar Qoraqalpog‘iston Respublikasi (14 570 000 so‘m), Namangan (15 070 600 so‘m) va Farg‘ona viloyatlarida (15 716 500 so‘m) kuzatilgan.

Hududlar bo‘yicha aholi jon boshiga umumiy daromadlarning eng yuqori real o‘sishi Toshkent shahri (7,6 foiz), Navoiy (5,7 foiz), Sirdaryo (4,4 foiz), Andijon (4,4 foiz) va Jizzax (4,3 foiz) viloyatlarida kuzatilgan.

E’tiborlisi, 5ta hududda: Xorazm (-6,4 foiz), Surxondaryo (-0,8 foiz), Samarqand (-0,5 foiz), Buxoro (-0,4 foiz) va Namangan (-0,3 foiz) viloyatlarida aholi jon boshiga real daromadlar qisqargan. Ya’ni bu hududlar aholisi o‘rtacha olganda kambag‘allashgan.

Aholining umumiy daromadlari hajmining sezilarli darajada o‘sishi asosan umumiy daromadlar tarkibida 29,7 foiz ulushga ega bo‘lgan yollanma ishchilarning daromadlari va 34,3 foiz ulushga ega mustaqil ravishda band bo‘lishdan olingan daromadlar hamda 26,7 foizni tashkil etuvchi transfertlardan olingan daromadlarning sezilarli o‘zgarishi hisobiga yuzaga kelgan.

Kun.uz avvalroq 2023 yilda davlat budjeti daromadlarining o‘sishi keskin sekinlashgani haqida xabar bergandi.

Shuningdek, o‘tgan yili O‘zbekistonning yalpi ichki mahsuloti 6 foizga o‘sib, 90,8 mlrd dollarni tashkil etgan. Aholi jon boshiga YaIM 29,3 mln so‘m yoki 2494 dollarga yetgan.