«Roma» boshqa bir afsonasini jamoada saqlab qoladi

«Roma» yarimhimoyachisi Daniele De Rossi rimliklar bilan ikki yilga mo‘ljallangan yangi shartnoma imzolaydi. Bu haqda Sky Sport Italia nashri xabar tarqatdi.

Butun faoliyati davomida «Roma» safida to‘p surib kelayotgan 33 yoshli futbolchining amaldagi shartnomasi joriy yilning 30 iyunida nihoyasiga yetishi kerak edi.

Manba bergan ma'lumotlarga ko‘ra, tomonlar yangi shartnoma bo‘yicha kelishuvga erishgan. Yangi bitim bo‘yicha yaqin kunlarda rasmiy ma'lumot berilishi kutilmoqda.

Eslatib o‘tamiz, oldinroq «Inter» De Rossini o‘z safida ko‘rishni istagan va unga 2 yillik shartnoma taklif qilgandi.