Avtomobil boshqaruvida niqobsiz bo‘lish ham jarimaga sabab bo‘ladi - IIV

O‘zbekiston hukumati maxsus komissiyasi o‘rnatgan tartib bilan jamoat joyida himoya niqobisiz bo‘lish ma'muriy javobgarlikka sabab bo‘ladi. Ushbu holat avtomobil boshqaruvidagi haydovchilarga nisbatan ham tatbiq etiladi.

Ichki ishlar vazirligi matbuot kotibi Shohrux G‘iyosovning aytishicha, avtomobildagi yo‘lovchi va haydovchilarning ham jarimaga tortilishiga aholining karantin tartibiga bepisand munosabatda bo‘layotgani sabab bo‘ldi.

«Masalan, Eski Juva dehqon bozori yaqinida, ya'ni jamoat joyida niqobsiz bo‘lgan fuqaro avtomobildan tushgani, niqobni mashinada unutib qoldirganini vaj qilib keltirmoqda. Shu sababli, aholi salomatligi va osoyishtaligini ta'minlash, virus tarqalishini kamaytirish maqsadida avtomobil boshqaruvidagi haydovchi ham niqob taqishga majbur», - deya munosabat bildirdi G‘iyosov.

Ayni paytda O‘zbekistonda koronavirus infeksiyasi qayd etilishi holatlari 83tani tashkil etmoqda. Ulardan 35 nafari erkak, 48 nafari esa ayollar. Shundan 5 nafari voyaga yetmagan bolalardir.

Ta'kidlanishicha, bemorlarning 15 nafarida o‘pka yallig‘lanishi belgilari kuzatilyapti, 7 nafarining ahvoli mutaxassislar tomonidan og‘ir, deb baholanmoqda.