Xonadonda gaz portlashi oqibatida 12 yoshli bola halok bo‘ldi

To‘raqo‘rg‘on tumanidagi xonadonlardan birida gaz portlashi oqibatida bir bola halok bo‘lgan.

To‘raqo‘rg‘on tuman hokimligi axborot xizmatining xabar berishicha, 23 iyun kuni Namangan viloyati To‘raqo‘rg‘on tumani Sohilobod mahallasi «Niyozboyev» ko‘chasidagi xonadonda yong‘in sodir bo‘ldi.

Aniqlanishicha, yong‘in oqibatida 2009 yilda tug‘ilgan A.M. voqea joyida vafot etgan. Shuningdek, yashash uyining anchagina qismi va uy-ro‘zg‘or buyumlari yonib zararlandi. 

Dastlabki surishtiruvlar natijasiga ko‘ra, xonadon egalari suyultirilgan ballonli gazdan foydalanish qoidalariga umuman rioya etmagan. Uy yerto‘lasidan oshxona sifatida foydalanilgan bo‘lib, u yerda mo‘ri yoki havo almashtirgich moslamasi bo‘lmagan.