Rossiyada fuqarolik samolyotining dron bilan to‘qnashuvi bo‘yicha ilk holat qayd etildi

Rossiyada fuqarolik samolyotining dron bilan to‘qnashuvi bo‘yicha ilk holat qayd etildi, deb yozdi RBK. Hodisa 2 avgust kuni Kamchatkada, An-26 samolyoti Petropavlovsk - Tilichiki muntazam reysini amalga oshirayotganda sodir bo‘lgan.

Aeroport texniklari samolyot qo‘nganidan keyin uning korpusida 11 santimetrlik chuqurcha borligini aniqladi. Ekipaj dastlab parvozda qush bilan to‘qnashuv sodir bo‘lganini taxmin qilgan.

«Rosaviatsiya»ning keyingi tekshiruvi bu variantni istisno qildi va shikastlanish «aniqlanmagan obekt, ehtimol dron bilan to‘qnashuvda» sodir bo‘lgan degan xulosaga keldi. Bu qanday dron bo‘lgani va uni kim uchirgani noma’lumligicha qoldi.

Dron bilan to‘qnashuv vaqtida samolyot bortida 28 kishi bo‘lgan, ularning hech biri jabrlanmagan. Hozir zarar ko‘rgan bortdan odatdagi tartibda foydalanilmoqda.

Rossiyaning ko‘plab hududlarida urush boshlanganidan keyin xususiy dronlarni uchirishga taqiqlar joriy etildi. Kamchatkada aholi punktlari va energetika korxonalari ustida dronlarni havoga ko‘tarish taqiqlangan.

So‘nggi paytlarda Rossiyaning Yevropa qismida Ukraina dronlarining hujumlari tez-tez sodir bo‘layotgani sababli fuqarolik aeroportlari muntazam ravishda faoliyatini to‘xtatmoqda. «Rosaviatsiya»da bunga har safar «parvozlar xavfsizligini ta’minlash» sabab qilib ko‘rsatiladi.