Moskvada o‘zbekistonlik va qirg‘izistonlik muhojirlar ommaviy janjal yuzaga keltirdi

Rossiya poytaxti Moskvada o‘zbekistonlik va qirg‘izistonlik muhojirlar o‘rtasida ommaviy janjal yuzaga kelgan. Bu haqda o‘z manbalariga asoslanib «Interfaks» xabar bermoqda.

Manbada aytilishicha, uch nafar o‘zbekistonlik hamda o‘nlab qirg‘izistonliklar Moskvadagi Tekstilshik tumani hududidagi Grayvoronovskaya ko‘chasida o‘zaro kelishmovchilik sabab janjallashgan. Oqibatda uch kishi pichoq zarbidan yaralangan. Ulardan biri O‘zbekiston fuqarosi ekani aytilmoqda.

Janjal sabab 10 kishi qo‘lga olingan va ularga nisbatan chet el fuqarosining Rossiyada bo‘lish tartibini buzganlik bo‘yicha ma’muriy bayonnoma rasmiylashtirilgan. Bunday ayblov bilan muhojir 5 ming rubl jarimaga tortilishi yoki mamlakatdan chiqarib yuborilishi mumkin. Shuningdek, pichoq bilan tanaga og‘ir jarohat yetkazganlar ustidan jinoiy ish ochilgan.