O‘zbekistonda elektromobillar uchun utilizatsiya yig‘imi 78,5 mln so‘mgacha oshirildi

O‘zbekiston bosh vaziri Abdulla Aripov elektromobillarga utilizatsiya yig‘imi miqdorini oshirish to‘g‘risida qaror imzoladi.

2025 yil 1 maydan e’tiboran, ishlab chiqarilganiga 3 yildan oshmagan elektromobillar uchun BHMning 120 baravari (45 mln so‘m) miqdorida utilizatsiya yig‘imi undiriladi. Bu – amaldagi yig‘im miqdori (30 BHM, 11 mln 250 ming so‘m)dan 4 barobarga ko‘p.

Ishlab chiqarilganiga 3 yildan oshgan elektromobillar uchun esa utilizatsiya yig‘imi miqdori BHMning 210 baravari (78,75 mln so‘m) deb belgilanadi. Bu – amaldagi yig‘im miqdori (90 BHM, 33 mln 750 ming so‘m)dan 2,3 barobarga ko‘p.

Iqtisodiyot va moliya vazirligi Investitsiyalar, sanoat va savdo vazirligi bilan birgalikda ikki oy muddatda ushbu qarorda belgilangan utilizatsiya yig‘imlarini yig‘ish hamda ulardan samarali foydalanish tartibini ishlab chiqadi.

Qarorda yozilishicha, hujjat “mamlakatda yashil texnologiyalardan foydalanishni kengaytirish, elektromobillarning yaroqsiz holga kelib qolgan batareyalarini atrof-muhitga keskin zarar yetkazmagan holda utilizatsiya qilishni ta’minlash hamda sohada mahalliylashtirish ishlarini yanada jadallashtirish maqsadida” qabul qilingan.

O‘zbekistonda 2025 yildan elektromobil akkumulyatorlari uchun utilizatsiya yig‘imi joriy etish taklif qilinayotgani o‘tgan yilning oktyabrida ma’lum bo‘lgandi.