Avtomobil bozori. Narxlar qanday o‘zgaryapti?

O‘zbekiston avtomobil bozorida elektromobillar taklifi oshib boryapti. So‘nggi 6 oylikda Lacetti va Cobalt bahosi oylik nisbatda yo o‘zgarmagan yoki arzonlashgan. Malibu va Tracker narxlarida esa beqarorlik kuzatilyapti.

Makroiqtisodiy va hududiy tadqiqotlar instituti (MHTI) mutaxassislari tomonidan ikkilamchi bozordagi avtomobillar narxlarining o‘zgarishi tahlil qilindi.

Qayd etilishicha, 2024 yil iyun oyida jami takliflarda elektromobillar ulushi 5,4 foiz bo‘lgan bo‘lsa, 2026 yil aprelida bu ko‘rsatkich 10 foizga yetdi. Mahalliy avtomobillar ulushi esa 53,7 foizdan 47 foizgacha qisqargan.

Umuman olganda, aprel oyida takliflar soni mart oyiga nisbatan kamaydi. Tozalangan ma’lumotlar bo‘yicha jami e’lonlar soni 13,5 mingtani tashkil etdi. Bu mart oyiga nisbatan 18,6 foiz kam, biroq o‘tgan yilning mos davriga nisbatan 59,6 foiz ko‘p.

Mahalliy ommabop avtomobillar narxlari barqaror tarzda saqlanib qolyapti. Kam haydalgan Cobalt median narxi 12 900 dollar atrofida o‘zgarmagan, Onix esa 14 800 dollargacha qimmatlashgan. Shu bilan birga, ayrim Damas, Labo va Nexia modellarida pasayish kuzatilgan.

Xorijiy avtomobillar segmentida esa narx dinamikasi har xil shakllangan. Kam foydalanilgan ayrim Chery va Kia modellarida pasayish kuzatilgan bo‘lsa, ko‘p va o‘rtacha foydalanilgan lyuks segmentdagi Karnival hamda Sorento modellari qimmatlashgan.

Elektromobillar segmentida BYD Seagull narxi 15,5-16 ming dollar, Yuan Up narxi 20-21,5 ming dollar, Chazor narxi esa 20,5-22 ming dollar atrofida shakllangan.

So‘nggi 6 oylik davrni oladigan bo‘lsak, Lacetti va Cobalt bahosi oylik nisbatda yo o‘zgarmagan yoki arzonlashgan. Malibu va Tracker narxlarida esa beqarorlik kuzatilyapti.

Tahlil OLX platformasidagi ochiq e’lonlar asosida tayyorlangan.