Farg‘onada Cobalt yo‘l chetida ketayotgan 5 kishini urib yubordi. 2 kishi halok bo‘ldi

Farg‘ona viloyati Dang‘ara tumanida odamlar o‘limi bilan bog‘liq yo‘l-transport hodisasi sodir bo‘lgan.

IIV axborot xizmatining xabar berishicha, hodisa 2024 yil 5 mart kuni kechki payt sodir bo‘lgan.

1997 yilda tug‘ilgan haydovchi Cobalt mashinasida harakatlanayotib boshqaruvni yo‘qotgan va yo‘l chetida ketayotgan 5 kishini urib yuborgan.

Oqibatda piyodalarning ikki nafari og‘ir tan jarohatlari olib voqea joyida vafot etgan. Qolgan uch nafari shifoxonaga yotqizilgan.

Qayd etilishicha, hodisa yuzasidan jinoyat ishi qo‘zg‘atilib, hozirda dastlabki tergov harakatlari olib borilmoqda.