Haftaning birinchi yarmida yomg‘ir yog‘adi va havo salqin bo‘ladi - «O‘zgidromet»

Uzoq muddatli quruq ob-havodan so‘ng, bugun O‘zbekistonning janubi-g‘arbiy hududlariga Turkmaniston ustida shakllangan yuqori siklon bilan bog‘liq nam havo massasi tarqala boshlaydi.

Foto: Kun.uz

“O‘zgidromet” xabariga ko‘ra, Buxoro, Navoiy, Qashqadaryo, Surxondaryo va Samarqand viloyatlarida ba’zi joylarda qisqa muddatli yomg‘ir yog‘adi, momaqaldiroq bo‘lishi mumkin. Respublikaning qolgan hududlarida yog‘ingarchiliksiz ob-havo saqlanib turadi. Kunduzgi harorat 25-30 daraja issiq atrofida, yomg‘ir paytida 20-25 daraja issiq bo‘ladi.

19-20 aprel kunlari O‘zbekistonning barcha hududlariga siklon ta’siri tarqaladi. Respublika bo‘yicha yomg‘ir yog‘adi, ba’zi joylarda kuchli bo‘lishi mumkin. Havo harorati asta-sekin pasayadi va 20 aprelda 28-23 daraja issiqni tashkil etadi.

18 va 19 aprelda ba’zi joylarda shamol 17-22 m/s gacha kuchayadi, ayrim joylarda chang kuzatiladi.

Ish haftasining ikkinchi yarmida O‘zbekiston bo‘yicha quruq ob-havo bo‘lishi kutilmoqda. Kechalari biroz salqin bo‘ladi, 22 aprelga kelib kunduz kuni harorat yana 25-28 daraja issiqqacha ko‘tariladi.

18-21 aprelda respublikaning tog‘oldi va tog‘li hududlarida sel-toshqin hodisalari kuzatilishi mumkin.

Tayyorlagan: Отабек Матназаров

#ob-havo #O‘zgidromet