Davlat korxonalarida boshqaruv xodimlari soni qisqartiriladi

Davlat kompaniyalarida boshqaruv xodimlari soni 10 foizga qisqartirilishi va top menejerlar uchun KPI kiritilishi kutilmoqda.

Illyustrativ surat

19 noyabr kuni “Davlat korxonalarida tannarxni kamaytirish va samaradorlikni oshirish chora-tadbirlari to‘g‘risida” prezident farmoyishi qabul qilindi.

Hujjat bilan, 2026 yilda davlat ulushi 50 foiz va undan yuqori bo‘lgan korxonalarda mahsulot tannarxini kamaytirish choralari belgilandi.

Davlat korxonalarida tannarxni kamaytirish va samaradorlikni oshirish masalalarini muvofiqlashtirish bo‘yicha respublika komissiyasi tuzildi. Komissiyaga Hisob palatasi raisining birinchi o‘rinbosari Mehriddin Abdullayev va bosh vazir o‘rinbosari – iqtisodiyot va moliya vaziri Jamshid Qo‘chqorov hamraislik qiladi.

Komissiya 2 oy muddatda davlat korxonalari boshqaruv xodimlari sonini 10 foizgacha qisqartirish yuzasidan Prezident administratsiyasiga taklif kiritishi kerak.

2025 yil 1 dekabrga qadar 2026 yil uchun davlat korxonalari rahbarlari faoliyatining eng muhim samaradorlik ko‘rsatkichlari (KPI) ishlab chiqiladi. Bu ko‘rsatkichlar aksiyadorlar tomonidan tasdiqlanganidan keyin, ularning ijrosini Boshqaruv samaradorligi agentligi monitoring qilib boradi.

2026 yil 1 iyulga qadar korxonada buxgalteriya uchun ERP modulini ishga tushirmagan yoki xarajatlarni qisqartirish bo‘yicha maqsadli ko‘rsatkichlarni bajarmagan kompaniya rahbarlarining tegishli o‘rinbosarlari lavozimidan ozod etiladi.

Davlat kompaniyalari prezident ruxsatisiz homiylik bilan shug‘ullanishni to‘xtatadi

Yirik korxonalarning kreditlari va tashqi qarzlari ustidan nazorat kuchayadi

Tayyorlagan: Комрон Чегабоев

#davlat aktivlari #korporativ boshqaruv