Yaponiyada to‘fon: Yuzlab aviareyslar bekor qilindi, temir yo‘llar harakati cheklanmoqda

Yaponiyaning sharqiy hududlariga hamda Xonsyu orolidagi Kanto viloyatiga "Mindul" to‘foni tufayli 400dan ortiq aviareysni bekor qilishga to‘g‘ri keldi. Jumladan, Tokiodagi "Xaneda" aeroportida uchishlarni amalga oshirishning imkoni bo‘lmagan.

Taqvimdagi o‘zgarishlar jami 49 ming kishining harakatlanishiga ta'sir ko‘rsatgan.

Bundan tashqari, Tokio tumani va Tokay viloyatida temir yo‘l faoliyatida uzilishlar yuzaga kelgan. Mahalliy nashrlarning qayd etishicha, keyingi 11 yil ichida ilk marta Kantoga tayfun yetib keldi.

Yaponiya meteorologiya agentligi ma'lumotiga ko‘ra, "Mindal" to‘foni markazida shamol tezligi soatiga 180 kilometrni tashkil qilmoqda. Meteorologlar suv toshqini va ko‘chkilar bo‘lishidan ogohlantirmoqda.

23 avgust kuni Yaponiya shimolidagi Xokkaydo oroliga yana bir tayfun bostirib kelishi kutilmoqda. Bundan tashqari, 25 avgust kuni Yaponiya janubi-g‘arbida "Rayonrok" tayfuni boshlanib, Okinava hamda Kyusyu oroli janubiga tahdid solishi mumkin.