«Kalmayegi» to‘foni Vetnamga yopirildi: halok bo‘lganlar bor

7 noyabr kuni tongda mahalliy hokimiyat ma’lumot berishicha, Filippin tomonidan kelgan «Kalmayegi» to‘foni Vetnamning markaziy viloyatlarida kamida besh kishining o‘limiga, yana yetti kishining jarohat olishiga sabab bo‘ldi.

To‘fon 6 noyabrdan 7 noyabrga o‘tar kechasi mamlakatning markaziy qismiga yopirilib, sel yomg‘irlari va kuchli shamolni keltirib chiqardi. Vietnam News gazetasi Vetnam qishloq xo‘jaligi va atrof-muhitni muhofaza qilish vazirligi huzuridagi to‘g‘onlar boshqaruvi va favqulodda ofatlar oldini olish departamentiga tayanib yozishicha, tabiat ofatining asosiy zarbasi tog‘li Daklak va Zyalay viloyatlariga to‘g‘ri kelgan hamda barcha talafotlari shu yerda qayd etilgan. Kuyangnay qirg‘oqbo‘yi viloyatida uch kishi bedarak yo‘qolgan.

Kuchli shamollar tufayli 57 ta uy vayron bo‘ldi, deyarli 2800 ta inshoot turli darajada zarar ko‘rdi. Markaziy mintaqa bo‘ylab 1,6 mlndan ortiq aholi elektr ta’minotisiz qoldi. Bundan tashqari, kuchli to‘lqinlar sabab 11 ta baliqchi qayig‘i cho‘kib ketgan. Bir necha yo‘llar buzilgan, ko‘chkilar qayd etilgan.

Mahalliy hokimiyat zararni baholash va tiklash ishlarini tashkil etmoqda. Qidiruv-qutqaruv ishlariga 268 mingdan ortiq harbiy xizmatchi jalb etilgan.

Vetnam Milliy gidrometeorologik prognoz markazi ma’lum qilishicha, җuma (juma-shanba oralig‘i)da Txanxoa viloyatidan Kuangchi viloyatining shimoliy qismigacha bo‘lgan hududda yog‘ingarchilik 200 mmgacha yetishi kutilgan.

Joriy yilda Janubiy Xitoy dengizi akvatoriyasiga kirgan 13-to‘fon hisoblanuvchi «Kalmayegi» Vetnamga Filippin tarafdan kelib kirdi. U yerdagi so‘nggi ma’lumotlarga ko‘ra, kamida 188 kishi halok bo‘lgan, 96 kishi jarohat olgan, yana 135 kishi bedarak yo‘qolganlar sifatida qidirilmoqda.