Indoneziyada o‘rmon yong‘inlari kuchaydi

Indoneziyaning Riau viloyatida 27 avgust kuni 30ta o‘rmon yong‘inlari o‘chog‘i qayd etildi. Bu haqda Straits Times xabar bergan.

Indoneziya aeronavtika va kosmos milliy instituti (LAPAN) ma'lumotiga ko‘ra, mamlakat g‘arbidagi Riau viloyatining katta hududini o‘rmon yong‘inlari qamramoqda.

Bundan oldingi xabarlarda yong‘inlar qo‘shni Singapur aholisiga ham ta'sir ko‘rsatayotgani aytilgandi.

Ayni vaqtda jami 5ta viloyatda - Jambi, G‘arbiy Kalimantan, Riau, Janubiy Sumatra va Janubiy Kalimantan viloyatlarida kuchli o‘rmon yong‘inlari tufayli trevoga e'lon qilingan.

Riau viloyatining o‘zida yong‘inga qarshi kurash ishlariga 7,2 ming kishi jalb etilgan. Sumatra va Kalimantanda o‘t o‘chirish ishlarida 17ta vertolyot va samolyot ishtirok etmoqda.