Malayziya va Indoneziyadan jalb qilingan sayyohlar uchun subsidiya ajratiladi

O‘zbekistonda Umra plyus ziyorat turizmi dasturi doirasida Malayziya va Indoneziyadan sayyohlarni jalb qilayotgan turoperatorlarga subsidiya ajratish tartibi tasdiqlandi. Unga ko‘ra, har bir sayyoh uchun 100 AQSh dollari miqdorida subsidiya beriladi.

Adliya vazirligi Umra plyus ziyorat turizmi dasturi asosida Malayziya va Indoneziyadan sayyohlarni jalb qilayotgan turoperatorlarga subsidiya ajratish tartibi to‘g‘risidagi nizomni davlat ro‘yxatidan o‘tkazdi.

Nizomga ko‘ra, Malayziya va Indoneziyadan umra ziyoratiga yo‘l olgan yoki undan qaytayotgan har bir sayyoh uchun mahalliy turoperatorlarga 100 AQSh dollari miqdorida subsidiya ajratiladi.

Subsidiya olish istagida bo‘lgan turoperatorlar Turizm qo‘mitasiga Davlat xizmatlari markazlari (DXM) orqali yoki Yagona interaktiv davlat xizmatlari portali (my.gov.uz) orqali murojaat qilishlari mumkin.

Subsidiya olish uchun ariza topshirish va uni ko‘rib chiqish bepul amalga oshiriladi. Ariza Turizm qo‘mitasi tomonidan 10 ish kuni davomida ko‘rib chiqiladi.

Agar subsidiya ajratish to‘g‘risida qaror qabul qilinsa, pul mablag‘lari talabgorga 5 ish kuni ichida o‘tkazib beriladi.

Subsidiya quyidagi shartlar asosida beriladi: sayyoh Malayziya yoki Indoneziya fuqarosi bo‘lishi, Saudiya Arabistoniga umra safariga ketayotgan yoki undan qaytayotgan bo‘lishi hamda O‘zbekistonda kamida 3 kecha tunab qolgan bo‘lishi kerak.

Mazkur subsidiyalar 2026 yil 31 dekabrga qadar ajratiladi.