Rossiya AQSh bilan yadro sohasidagi hamkorlikni to‘xtatadi

Rossiya yadro va energetika sohalarida ilmiy tadqiqotlar olib borish bo‘yicha AQSh bilan mavjud kelishuvlar ijrosini to‘xtatdi. Bu haqda Rossiya hukumati saytida xabar qilingan.

RF hukumatida izoh berishlaricha, AQShning Rossiyaga nisbatan sanksiyalari tufayli shunday qaror qabul qilingan. 

«2014 yil aprelida «Rosatom» davlat korporatsiyasi AQSh energetika vazirligining byurosidan Vashington Ukrainadagi voqealar sababli, atom energetikasi sohasida hamkorlikni to‘xtatishi bildirilgan maktub olgan edi», — deyiladi xabarda. 

Ta'kidlanishicha, AQSh ma'muriyatining bunday qarori kelishuv shartlarini buzish orqali qabul qilingan. 
 
AQSh va Rossiya o‘rtasidagi kelishuv 2013 yil 16 sentabrda Venada imzolangan edi.