AQSh razvedkachi samolyoti Rossiyaning Suriyadagi bazasi yaqinidan uchib o‘tdi

Amerikaliklarning kemalar harakatini kuzatuvchi R-8A Poseidon rusumli harbiy samolyoti 16 oktabr kuni O‘rta Yer dengizining sharqiy hududida, Rossiya kemalari joylashgan hududdan uchib o‘tdi. Bu haqda harbiy aviatsiyadagi manbaga asoslangan holda «Interfaks» agentligi xabar bergan.

Aniqlik kiritilishicha, AQShning Sitsiliyadagi Sigonella aviabazasidan chiqqan samolyot Rossiyaning Tartusdagi kemalariga 100 km masofada yaqinlashgan.

Agentlik ma'lumotiga ko‘ra, ayni vaqtda bort raqami 168858 bo‘lgan R-8A samolyoti Kipr va Livan o‘rtasida, Suriya qirg‘oqlaridan uzoq bo‘lmagan hududlarda aylana hosil qilib uchib yuribdi.

Keyingi vaqtlarda amerikaliklarning Rossiya bilan chegaralarda kuzatuv parvozlari ko‘paygan.

15 oktabr kuni Sitsiliyadagi bazadan ko‘tarilgan RQ-4 Global Hawk strategik razvedka droni Qrim yaqinidan uchib o‘tdi. 

Oktyabr oyi boshida ham P-8A Poseidon samolyoti O‘rta Yer dengizining sharqiy akvatoriyasida parvoz qilgan, boshqa bir RC-135W samolyoti Qora dengizidan Qrimga yaqinlashib uchgandi.