Ukraina Taganrog portida tanker, ikki samolyot va «Iskander» tizimini yo‘q qildi

Ukraina dronlari 30 mayga o‘tar kechasi Rostov oblastidagi Taganrog shahriga, Krasnodar o‘lkasidagi Armavirga hamda anneksiya qilingan Qrimdagi Feodosiyaga hujum qildi.

Taganrog portidagi neft tankeriga zarba

Rostov oblasti gubernatori Yuriy Slyusar Taganrog portida tanker va yoqilg‘i saqlanuvchi rezervuarlar, shuningdek, ma’muriy bino yonib ketganini ma’lum qildi. Uning so‘zlariga ko‘ra, jabrlanganlar yo‘q.

Shahar meri Svetlana Kambulova xabar berishicha, portda «prichaldagi yuklash infratuzilmasi» ham shikastlangan, shaharda esa bir necha binolarning, jumladan, bolalar bog‘chasi derazalari to‘kilgan. Uning ma’lumotlariga ko‘ra, ikki kishi dronlar parchasi qulashi oqibatida yaralangan. Hujumdan keyin shahar rasmiylari dronlar hujumi tufayli 27 kuni joriy etilgan «favqulodda holat rejimi chegaralari»ni kengaytirishga qaror qilgan.

Merning hisobot berishicha, portdagi yong‘in bartaraf etilgan, neft sizib chiqishi ro‘y bermagan.

Ukraina qurolli kuchlari Pilotsiz tizimlar kuchlari qo‘mondoni Robert Brovdi («Major» chaqiruv belgisiga ega) Taganrog portida «yashirin flot»ga mansub tanker hamda «Kurgannefteprodukt» neft bazasiga zarba berilganini ma’lum qilgan.

Bundan tashqari, uning so‘zlariga ko‘ra, Taganrogdagi harbiy aerodromda Tu-142 rusumli ikkita samolyot va «Iskander» raketa kompleksi yo‘q qilingan. Brovdi aerodrom va tankerga berilgan zarbalar aks etgan videolarni e’lon qilgan.

Zarba vaqtida Taganrogdagi harbiy aerodromda turgan Tu-142 samolyotlari.
Dron orqali olingan videodan skrinshot

Shuningdek, dronlar anneksiya qilingan Qrim hududidagi Feodosiya shahridagi neft bazaga ham hujum qilgan. Guvohlar tomonidan olingan kadrlarda hujumdan keyin bazada yong‘in chiqqani aks etgan.

Feodosiyadagi neft bazasiga hujumdan keyin chiqqan yong‘in

Feodosiyadagi dengiz neft terminaliga hujum vaqti olingan videodan skrinshot

Qrimda Ukraina dronlari R-280 «Novorossiya» federal trassasini (yarimorolni Rostov oblasti bilan bog‘laydi) minalashtirishi oqibatida benzin taqchilligi boshlangan. Yonilg‘i quyish shoxobchalarida benzin talon bilan sotilmoqda – bir kishi bir kunda 20 litrdan ortiq yoqilg‘i xarid qila olmaydi. Shu bilan birga, ko‘plab zapravkalarda yoqilg‘i shunchaki qolmagan. Hudud rahbari Sergey Aksenov vaziyat yaqin 30 kun ichida normallashishini va’da qilmoqda.

Ukraina prezidenti Volodimir Zelenskiy Armavirdagi neft bazasiga hujumni alohida qayd etgan. «Bizning navbatdagi uzoq masofali tadbirimiz. Bu davlat chegaramizdan 500 kilometr masofadagi nishon bo‘ldi», – deya yozgan Zelenskiy telegram-kanalida.

«Urushni kelib chiqqan joyiga qaytarayotganimiz juda adolatli. Rossiya o‘z tajovuzini allaqachon tugatishi mumkin edi, ammo uning o‘zi cho‘zishni va davom ettirishni tanladi», – deya qo‘shimcha qilgan u.