NASA astronavti Pirs Sellers saraton tufayli vafot etdi

NASA astronavti Pirs Sellers AQShning Texas shtatidagi Xyuston shahrida vafot etdi. Bu haqda milliy fazo agentligi saytida xabar berilgan.

Sellers 61 yoshda edi. Uning o‘limiga oshqozon osti bezi saratoni sabab bo‘lgani aytilmoqda. Astronavt unda onkologik xastalikning to‘rtinchi darajasi topilgani haqida yanvarda ma'lum qilgandi.

Ma'lumot uchun, Sellers ilk bora fazoga 2002 yilda Atlantis STS-112 shattlida parvozga chiqqan va Xalqaro fazo stansiyasi qurilishi munosabati bilan uch marotaba ochiq makonga chiqqan. U ikkinchi marotaba ekspeditsiyada 2006 yilda Discovery STS-121 kemasida qatnashgan. Sellers hammasi bo‘lib orbitada 23 sutkadan ortiq vaqt davomida bo‘lgan.

Fazogir o‘z faoliyatini yakunlagandan so‘ng iqlimshunoslik va ekologiya bilan shug‘allangan. Shuningdek, Sellers iqlim tizimlarining kompyuter modellarini yaratish bilan ham band bo‘lgan. 

«Undan bizga nafaqat global isish haqida eslatma, balki sayyoramizni boshqarish bo‘yicha yaxshiroq strategiyaga o‘zgartirishga umid ham meros bo‘lib qoldi», - deya ta'kidlab o‘tilgan NASAda.