Toshkent AQSh va Eron o‘rtasidagi diplomatik yutuqni yuqori baholadi

O‘zbekiston tashqi ishlar vazirligi Amerika Qo‘shma Shtatlari va Eron Islom Respublikasi o‘rtasida o‘zaro Anglashuv memorandumi imzolanganini mintaqaviy xavfsizlik va barqarorlikni ta’minlash yo‘lidagi muhim diplomatik yutuq sifatida baholadi.

Foto: Sputnik / Avenir Deberdeyev

Vazirlik bayonotida qayd etilishicha, hozirgi murakkab xalqaro sharoitda erishilgan kelishuv keskinlikni yumshatish va tinchlikka erishishga xizmat qiladigan muhim qadam hisoblanadi.

Rasmiy Toshkent AQSh va Eron rahbariyatining hal qiluvchi pallada namoyon etgan siyosiy irodasi hamda uzoqni ko‘ra bilishini alohida e’tirof etdi.

Shuningdek, O‘zbekiston mazkur kelishuvga erishish uchun zarur sharoitlarni yaratishga hissa qo‘shgan Pokiston va Qatarning sa’y-harakatlarini yuqori baholab, Turkiya, Saudiya Arabistoni, Misr va boshqa mintaqaviy hamkorlarning ishtirokini ham alohida qayd etdi.

Toshkent muzokaralarning keyingi bosqichlari konstruktiv ruhda davom etishi va erishilgan kelishuvlar samarali amalga oshirilishiga umid bildirib, xalqaro nizolarni diplomatik vositalar orqali hal etish tinchlik va xavfsizlikni ta’minlashning asosiy sharti bo‘lib qolishini ta’kidladi.