Amina Muhammad BMT Bosh kotibining birinchi o‘rinbosari etib tayinlandi

BMT Bosh kotibi Antoniu Guterreshning birinchi o‘rinbosari etib muslima ayol Amina Muhammad tayinlandi. Rasmiy marosim Nyu-Yorkda bo‘lib o‘tdi. Bu haqda Muxlis.uz xabar bermoqda. 

“Men bor kuch-salohiyatimni barqaror taraqqiyot maqsadlarini amalga oshirish uchun sarf qilaman. Aynan barqaror taraqqiyot — Yer yuzida tinchlikni saqlashning eng samarali va ishonchli yo‘li”, — dedi Amina Muhammad marosimda. U, shuningdek, kambag‘allikka qarshi kurashish, yoshlarga yangi imkoniyatlar yaratish va ayollar huquqlarini himoya qilish borasidagi qilinishi kerak bo‘lgan ishlar haqida ham gapirgan. 

Qayd etish kerakki, 1961 yilda tug‘ilgan Amina Muhammad Nigeriya va Britaniyada tahsil olgan. Bungacha u Nigeriya prezidenti maslahatchisi va Nyu-Yorkdagi Kolumbiya universiteti o‘qituvchisi bo‘lgan. Oilali, 6 farzandning onasi.