Braziliyada ikki sobiq prezident ishtirokidagi korrupsiya mojarosi avj olmoqda

Braziliya Bosh prokurori Rodrigu Jano mamlakatning ikki sobiq prezidentlari Dilma Russeff va Luis Inasiu Lula da Silvaga nisbatan korrupsiya bo‘yicha jinoiy ish qo‘zg‘atishni so‘ramoqda. Bu haqda Globo gazetasi o‘z manbalariga asoslangan holda xabar qilmoqda. 

Bundan tashqari, prokurorning ro‘yxatida kamida besh nafar amaldagi federal vazir, xususan, yangi tashqi ishlar vaziri Aloiziu Nunesning ismi-sharifi bor.

Bosh prokuror Jano Braziliya Oliy federal sudga murojaat qilib, jami 83 nafar siyosatchiga nisbatan korrupsiya bo‘yicha tergov olib borishga ruxsat berishni so‘ragan. Ta'kidlanishicha, barcha mulozimlarning nomlari rasman ma'lum qilinganicha yo‘q. Bundan tashqari, Jano oddiy fuqarolarga nisbatan yana 211ta so‘rovni tayyorlab qo‘ygan.