Putin va Erdo‘g‘an Turkiyaga S-400 tizimlarini yetkazishni muhokama qilishgan

O‘tgan haftada Moskvada Rossiya va Turkiya prezidentlari Vladimir Putin va Rajab Toyyib Erdo‘g‘an o‘rtasida o‘tgan muzokaralarda Anqaraga Rossiyaning havo hujumiga qarshi mudofaa tizimlari S-400’ni yetkazish masalasi muhokama qilingan. Bu ma'lumotni Rossiya prezidenti matbuot kotibi Dmitriy Peskov tasdiqladi.

"Tomonlar bu masalaga qiziqish bildirishmoqda va muzokaralar davom etadi", deb aytgan Peskov.

"Izvestiya" nashrining yozishicha, bu ma'lumotni Rossiya mudofaa vaziri Sergey Shoygu ham tasdiqlagan. Hozircha Turkiya ushbu masalaning turli jihatlarini o‘rganib chiqmoqda.

Agar muzokaralar muvaffaqiyatli davom etsa, bu Moskva va Anqara o‘rtasida harbiy-texnik hamkorlik doirasidagi birinchi shunday yirik shartnoma bo‘ladi.