O‘quv muassasalariga harbiy xizmatchilar orasidan pensionerlar ishga qabul qilinadi

O‘zbekiston Respublikasi Mudofaa vazirligi, Mehnat vazirligi, Moliya vazirligi hamda Oliy va o‘rta maxsus ta'lim vazirligining O‘rta maxsus, kasb-hunar ta'limi markazi tomonidan "Harbiy xizmatchilar orasidan pensionerlarni harbiy-akademik litseylar, shuningdek akademik litseylar va kasb-hunar kollejlariga ishga qabul qilish tartibi to‘g‘risida"gi nizom tasdiqlandi. Hujjat matni Lex.uz portalida e'lon qilindi. 

Hujjatga muvofiq, harbiy xizmatchilar orasidan pensionerlar harbiy akademik litseylarning bo‘sh (vakant) direktorlari, ularning o‘rinbosarlari va o‘qituvchilari, akademik litseylar va kasb-hunar kollejlarining chaqiruvga qadar boshlang‘ich tayyorgarlik fani rahbari, akademik litsey va kasb-hunar kollejlarining bo‘sh (vakant) ma'naviy-ma'rifiy ishlar bo‘yicha direktori o‘rinbosari hamda tarbiyachisi lavozimlariga ishga qabul qilinadi.

Pensionerlarni ishga qabul qilish ularni yoshlarni vatanparvarlik, vatanga muhabbat va sodiqlik ruhida tarbiyalash jarayoniga yanada kengroq jalb etish maqsadida amalga oshiriladi.