Fransiyada saylovlarning ilk natijalari e'lon qilindi

Fransiya prezidenti Emmanuel Makron tomonidan tuzilgan "Olg‘a, respublika" harakati Fransiya parlamentining quyi palatasi – Milliy kengashga saylovlarda yetakchilik qilmoqda. Bundan Fransiya ichki ishlar vazirligining saylov natijalari bo‘yicha taqdim qilgan ilk ma'lumotlari darak bermoqda.

Dastlabki ma'lumotlarga ko‘ra, Makron harakati nomzodlari 26,6 foiz ovoz to‘plaganlar. Fransiyaning eng yirik muxolif partiyasi "Respublikachilar" 16,4 foiz, Marin Le Penning "Milliy front" partiyasi 14,4 foiz, Jan-Lyuk Melanshonning "Zabt etilmagan Fransiya" partiyasi 10,2 foiz va "Sotsialistik partiya" 7,3 foiz ovoz to‘plagan.

Nomzodga 1-turda g‘olib bo‘lish uchun 50 foizdan ko‘proq ovoz kerak bo‘ladi. Ushbu shart bajarilmagan hududlarda bir xaftadan keyin, ya'ni 18 iyunda saylovlarning 2-turi bo‘lib o‘tadi. Unda eng ko‘p ovoz to‘plagan nomzod g‘olib bo‘ladi.