Armaniston yevropacha kelajakni tanladi - YeI rahbarlari

8 iyun kuni Yevropa Ittifoqi rahbarlari Nikol Pashinyanni saylovdagi muvaffaqiyati bilan tabrikladi. Yevropa komissiyasi raisi Ursula fon der Lyayyen Armanistonni demokratiya yo‘lidan borayotgan va Yevropa bilan munosabatlarni tobora mustahkamlayotgan muhim hamkor sifatida baholadi.

Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallasning ta’kidlashicha, Armaniston xalqi tashqi bosimlarga qaramasdan Yevropa kelajagi tomon tanlov qilgan. Yevropa kengashi raisi Antoniu Koshta esa mamlakatning tinchlik, barqarorlik va xalqaro hamkorlikka asoslangan yo‘lni tanlaganini yuqori baholadi.

Germaniya kansleri Fridrix Mers ham Pashinyan va Armaniston xalqini tabriklab, mamlakat aholisi demokratiya va tinchlik tarafida aniq tanlov qilganini ta’kidladi. Fransiya prezidenti Emmanuel Makron esa Armaniston suverenitetini qo‘llab-quvvatlash va Yevropa bilan aloqalarni yanada chuqurlashtirish bo‘yicha hamkorlikni davom ettirishga tayyorligini bildirdi.

Ispaniya bosh vaziri Pedro Sanches Armaniston aholisi barqarorlik va Yevropa bilan yaqinlashuv tarafida ovoz berganini qayd etgan bo‘lsa, Polsha bosh vaziri Donald Tusk mamlakat o‘zining siyosiy yo‘lini tasdiqlaganini ta’kidladi.

Ukraina prezidenti Volodimir Zelenskiy saylov natijalarini Armaniston mustaqilligi va suverenitetining g‘alabasi deb atadi. U Yevropa Ittifoqini Yerevanni qo‘llab-quvvatlashda faolroq bo‘lishga chaqirdi.

«Hozir aynan Yevropa Ittifoqi Armanistonni amaliy jihatdan qo‘llab-quvvatlashi kerak bo‘lgan vaqt. Bu YeI uchun ham muhim sinovdir», dedi Zelenskiy.

Shuningdek, Isroil tashqi ishlar vaziri Gideon Saar Pashinyanning Ozarboyjon bilan tinchlik va yarashuvga qaratilgan siyosati mintaqaviy barqarorlikka xizmat qilishini ta’kidladi. Hindiston bosh vaziri Narendra Modi ham Pashinyanni ta’sirli g‘alaba bilan tabriklab, ikki davlat o‘rtasidagi do‘stona munosabatlarni yanada mustahkamlashga tayyorligini bildirdi.

Gurjiston, Qozog‘iston va Moldova rahbarlari ham Armaniston bosh vazirini saylov natijalari bilan qutlagan.

Ayni paytda Moskvada boshqacha munosabat kuzatildi. Rossiya Tashqi ishlar vazirligi rasmiy vakili Mariya Zaxarova Armaniston hukumati rossiyaparast siyosiy kuchlarga bosim o‘tkazayotganini va Yevropa Ittifoqi mamlakat ichki ishlariga aralashayotganini iddao qildi.

Armaniston Markaziy saylov komissiyasi ma’lumotlariga ko‘ra, 7 iyun kuni bo‘lib o‘tgan parlament saylovlarida Nikol Pashinyanning «Fuqarolik shartnomasi» partiyasi 49,8 foiz ovoz to‘pladi. Rossiyalik milliarder Samvel Karapetyan yetakchilik qilgan «Kuchli Armaniston» bloki 23,3 foiz ovoz bilan ikkinchi o‘rinni egalladi.

Saylov natijalariga ko‘ra, «Fuqarolik shartnomasi» parlamentda 61 o‘ringa ega bo‘ladi. «Kuchli Armaniston» 28, «Armaniston» bloki 11 va «Farovon Armaniston» partiyasi 5 mandat qo‘lga kiritdi. Saylovda ishtirok etish darajasi 58,97 foizni tashkil etdi, bu esa so‘nggi ikki parlament sayloviga nisbatan yuqoriroq ko‘rsatkich hisoblanadi.

Tahlilchilar fikricha, mazkur natijalar Armanistonning tashqi siyosiy yo‘nalishi bo‘yicha muhim siyosiy signal bo‘lib, mamlakatning Yevropa bilan yaqinlashuv jarayoni yanada faollashishi mumkin.