O‘zbekistonda ingliz futbolchisi to‘p suradi

Avstraliya chempionatining «Pyort Glori» jamoasi a'zosi Rostin Griffits faoliyatini O‘zbekistonda davom ettirishi mumkin. Bu haqda Sports.Uz sayti xabar tarqatdi.

Manba bergan xabarga ko‘ra, 29 yoshli yarimhimoyachi Oliy liganing yetakchi klublaridan biri bilan shartnoma imzolashi kutilmoqda.

Biroq saytda Griffitsni milliy chempionatimizning qaysi jamoasi bilan og‘zaki kelishuvga erishgani haqida ma'lumotlar berilmagan. Tribuna.Uz manbalari bergan ma'lumotga ko‘ra, futbolchi katta ehtimol bilan Toshkentning «Paxtakor» klubi safiga o‘tishi mumkin. Uning O‘zbekistondagi yillik maoshi kamida 600 ming dollarni tashkil qiladi.

Ma'lumot o‘rnida, kelib chiqishi asli angliyalik bo‘lgan ushbu yarimhimoyachi faoliyatini «Blekbern Rovers» jamoasida boshlagan.

So‘ngra, Shotlandiyaning «Gretna», Angliyaning yana bir jamoasi  «Akkrington Stenli»,  Niderlandiyaning «Roda»,  Avstraliyaning «Adelaida Yunayted», «Sentral Kost Mariners», «Nort Kvinslend Furi» va «Pert Glori» jamoalarida to‘p surgan.