Iroq armiyasi Tall-Afar ustidan nazoratni qo‘lga kiritdi

Iroqlik qo‘shinlar Naynava viloyatidagi Tall-Afar shahri ustidan nazoratni to‘liq qo‘lga kiritdi. Bu haqda Sky News Arabia xabar bergan.

«Tall-Afarning bironta ham tumani iroqlik kuchlarning nazoratisiz qolmaydi», - deya ma'lum qilgan telekanal muxbiri.

Aholi punkti IShID terrorchilik guruhi jangarilari bilan shiddatli kechgan janglar davomida qo‘lga kiritildi. Shaharga Iroq armiyasi harbiy xizmatchilari, federal politsiya, aksilterrorchilik bo‘linmalari, shuningdek, xalq militsiyasi jangchilari kirgan.

Telekanal ma'lumotiga ko‘ra, ayni damda jangarilar tomonidan qoldirib ketilgan portlovchi qurilmalarni topish va uylarni minalardan tozalash bo‘yicha amaliyot olib borilmoqda. Tomonlar qancha yo‘qotishga uchragani xabar qilinmayapti. Ta'kidlanishicha, Iroq armiyasi vakillari yaqin vaqt ichida rasmiy bayonot bilan chiqadi.