Xitoylik bort kuzatuvchisi samolyotdan tushib ketdi

Xitoyning China Eastern aviakompaniyasi bort kuzatuvchisi eshikni yopishga urinayotganda samolyotdan tushib ketdi. South China Morning Post shu haqidagi xabari bilan bo‘lishdi. 

Manbada ta'kidlanishicha, voqea 23 oktabr kuni Shenchjen shahri aeroportida ro‘y bergan. Uch metr balandlikdan tushib ketgan bort kuzatuvchisini samolyotning parvozga tayyorlash ishlarini yakunlayotgan texnik xizmat xodimlari ko‘rib qolishgan. 

Qiz shifoxonaga yetkazilgan, unda qator yoriqlar va jarohatlar aniqlangan.

Ma'lumotlarga ko‘ra, bort kuzatuvchisi samolyot eshigini qoidaga xilof ravishda yopishga uringan. Qoidaga ko‘ra, samolyot eshigi ekipajning ikki nafar a'zosi ishtirokida yopilishi kerak.