Mirziyoyev Nukusdagi Samsung zavodiga bordi

Nukus shahrida ish boshlagan Samsung zavodiga kiraverishda tosh lavhaga shunday so‘zlar yozilgan: “Ushbu maishiy texnika vositalarini ishlab chiqarish zavodi O‘zbekiston Respublikasi prezidenti Shavkat Mirziyoyevning 2017 yil 21 yanvardagi Qoraqalpog‘iston Respublikasiga tashrifi davomidagi tashabbusi asosida barpo qilindi. 2017 yil 14 oktabrda zavod dastlabki mahsulotini ishlab chiqardi”. 

O‘zA’ning yozishicha, Nukus shahridagi sobiq “Nukus Remmash” mas'uliyati cheklangan jamiyatiga qarashli bino va inshootlarni rekonstruksiya qilish va qo‘shimcha binolar qurish hisobiga barpo etilgan zavodda televizorning to‘rt va changyutgichning o‘n uch turi ishlab chiqarilmoqda. 

Prezident Shavkat Mirziyoyev mazkur zavodni borib ko‘rdi. 

200 dan ortiq kishi bandligini ta'minlangan zavod eng so‘nggi rusumdagi uskunalar bilan jihozlangan. 

Prezident zavodning ishlab chiqarish jarayonini ko‘zdan kechirdi. Mahsulotlar sifati va ko‘lami bilan qiziqdi. 

Bugun mamlakatimizda maishiy texnika vositalari ishlab chiqarish hajmi oshdi. Aholining bu boradagi talabi qondirilmoqda. Endi bu sohada eksport hajmini oshiradigan vaqt keldi, dedi Shavkat Mirziyoyev. 

Davlat rahbari zavodda ishlab chiqarilayotgan mahsulotlar turini yanada ko‘paytirish bo‘yicha topshiriqlar berdi. 

Prezidentga “O‘zeltexsanoat” AK tomonidan kelgusida Qoraqalpog‘iston Respublikasida amalga oshirilishi rejalashtirilgan loyihalar taqdim qilindi. Loyihalarda yarim avtomat kir yuvish mashinalari, elektr shkaflar va suv isitish moslamalari, isitish moslamalari va radiatorlar, energiyatejamkor lampalar, maishiy texnika vositalarini sotish va texnik xizmat ko‘rsatish yo‘nalishlari bo‘yicha ma'lumotlar o‘rin olgan.