Samsung ish tashlash boshlanishiga 1,5 soat qolganda kasaba uyushmasi bilan kelishuvga erishdi

Bir necha kunlik natijasiz muzokaralardan so‘ng, tomonlar mehnat vaziri Kim Yonxun ishtirokida muzokara o‘tkazdi va mahalliy vaqt bilan taxminan soat 22:30 da – ish tashlash boshlanishi belgilangan muddatga 90 daqiqa qolganda – kelishuvga erishdi.

Samsung Electronics xodimlari kasaba uyushmasi raisi Chxve Sinxoning ma’lum qilishicha, ish beruvchi bilan erishilgan kelishuv loyihasi 27 mayga qadar kasaba uyushmalari a’zolari o‘rtasida ovozga qo‘yiladi. U xodimlarni odatdagidek ishga chiqishga chaqirdi.

Kelishuvga ko‘ra, yarimo‘tkazgichlar ishlab chiqarish bo‘linmasi xodimlari amaldagi bonus tizimiga qo‘shimcha ravishda, kompaniya operatsion foydasining 10,5 foizini oladi. Shuningdek, ish haqlari o‘rtacha 6,2 foizga oshirilishi nazarda tutilgan.

Samsung xodimlarining ish tashlashi – sun’iy intellekt tizimlari uchun yarimo‘tkazgichlarga talab ortib borayotgan bir paytda kun tartibiga chiqqan edi. Sungkyunkvan universiteti professori Kvon Sokjunning aytishicha, Samsung kompaniyasi – Koreya eksporti, fond bozori va yarimo‘tkazgichlar ta’minot zanjirida markaziy o‘rin tutishi sababli, ish faoliyatining har qanday to‘xtashi “milliy sanoat uchun jiddiy xavf” bo‘lar edi.

Financial Times'ning qayd etishicha, Samsung Electronics va uning mahalliy raqobatchisi SK Hynix sun’iy intellekt kompaniyalari orasida talab yuqori bo‘lgan yarimo‘tkazgichlar va yuqori tezlikda ishlovchi xotira mikrosxemalari bozorida deyarli duopoliyaga ega.

Avvalroq Koreya savdo, sanoat va energetika vaziri Kim Chjongvan ish tashlash oqibatida iqtisodiyotga yetkazilishi mumkin bo‘lgan zararni 100 trln von (66 mlrd dollar) deb baholagandi. Uning so‘zlariga ko‘ra, Samsung'dagi norozilik aksiyalari yana 1,7 mingta kompaniya faoliyatiga ham ta’sir qilishi mumkin edi.

The Korea Times gazetasi yozishicha, ish tashlash amalga oshirilgan taqdirda kunlik yo‘qotishlar 1 trln vondan (taxminan 664 mln dollar) oshib ketishi mumkin edi.