Foto: Dubay shayxlari nega har yili Qoraqalpog‘istonga keladi?

Qoraqalpog‘iston Respublikasi vazirlar kengashi rasmiy sayti Qoraqalpog‘iston axborot agentligiga asoslanib Dubay shayxlarining Qoraqalpog‘istonga tashrifi haqidagi maqolani e'lon qildi.

Qayd etilishicha, Dubay shayxlari ov mavsumini o‘tkazish uchun har yili Qoraqalpog‘istonga keladi. Ular ruxsatnoma asosida mamlakat Qizil kitobiga kiritilgan qushlar bilan hayvonlarni ov qiladi.

Arablar asosan ovchi qush – lochin yordamida tuvaloq ovlashni an'ana qilib olgan. Tuvaloq qushi Vazirlar Mahkamasining «Biologik resurslardan foydalanishni tartibga solish va tabiatdan foydalanish sohasida ruxsat berish tartib-taomillaridan o‘tish tartibi to‘g‘risida»gi qaroriga muvofiq noyob va yo‘q bo‘lib ketish xavfi ostidagi turlar safiga kirgizilgan. Xorijiy fuqarolar va yuridik shaxslar uchun qushning donasi 6000 AQSh dollari miqdorida belgilangan.