O‘zbekistonda 5,5 mingdan ko‘p rossiyalik Rossiya prezidenti saylovlarida ovoz berdi

O‘zbekistonda 5,5 mingdan ko‘p rossiyalik Rossiya prezidenti saylovlarida ovoz berdi. Bu natija 2012 yilgi saylovlardagi davomatdan deyarli 2 barobar ko‘proqni tashkil qilgan. Bu haqda Rossiyaning Toshkentdagi elchixonasi matbuot xizmati ma'lum qildi.

O‘zbekistonda yashovchi yoki vaqtinchalik bo‘lgan rossiyaliklar uchun saylov uchastkalari uchta shaharda – Toshkent, Buxoro va Farg‘onada soat 8:00dan ishlay boshladi. Ovoz berish soat 20:00gacha davom etgan. Avvalroq O‘zbekistonning 4 ta shahri – Navoiy, Samarqand, Guliston va Olmaliqda ham muddatdan avval ovoz berish bo‘lib o‘tgandi.

“Muddatdan avval va hozirgi saylov davomida biror-bir noxush hodisa qayd qilinmagan”, deb aytilgan elchixonada.   

Rossiyaning Toshkentdagi elchixonasi binosi oldida 18 martning birinchi yarmida ovoz beruvchilardan iborat bir necha yuz metrlik navbat yuzaga kelgan. Elchixona hududida tashrif buyurganlarga harbiy orkestr bayramona kayfiyat ulashgan.