Turkmanistonliklar endi pul ishlab topish uchun O‘zbekiston va Qozog‘istonga ketmoqda

Turkmanistonda davom etayotgan iqtisodiy qiyinchiliklar tufayli ko‘plab turkmanistonliklar chet elga ishlash uchun chiqib ketmoqda. Mavjud vaziyat sababli Turkmanistondan mehnat migratsiyasi oqimi ham oshib bormoqda, deb yozmoqda CA-news.

So‘nggi paytlarda O‘zbekiston va Qozog‘istonga mehnat muhojirlari sifatida chiqib ketishga harakat qilayotgan Turkmaniston fuqarolari haqida xabarlar paydo bo‘lmoqda. Bunga, xususan, Turkmaniston hukumati Turkiyaga migrantlar oqimini to‘xtatish bo‘yicha chora-tadbirlarni kuchaytirgani ham sabab bo‘ldi. Ushbu davlat turkmanistonliklar pul ishlab topish maqsadida boradigan asosiy joy sanaladi.

Mahalliy manbalar so‘ziga ko‘ra, Ashxobod aeroporti orqali reyslarga kiritilmagan mehnat migrantlari endilikda Turkiyaga O‘zbekiston yoki Qozog‘iston orqali jo‘nab ketishga urinmoqda.

Avvalroq, Ashxobod xalqaro aeroportida Turkmanistonning o‘nlab fuqarolari Istanbul va Dubayga reyslarga qo‘yilmayotgani haqida bir necha marta xabar berilgandi. Fevral oyida Turkmanistondan Ozarboyjonga mehnat migrantlari oqimi oshgani haqida xabarlar tarqalgandi.