Makgregor garov puli evaziga ozod qilindi

Aralash yakkakurash jangchisi Konor Makgregor UFC jangchilari ketayotgan avtobusga hujum qilgani uchun 6 aprelda Nyu-York sudi oldida javob berdi. Unga ko‘ra, irlandiyalik jangchini sud taftishigacha 50 ming dollar garov puli evaziga ozodlikka chiqarishga qaror qilingan. Bu haqda TMZ portali xabar bermoqda. 

Ma'lum qilinishicha, Makgregor UFC prezidenti Deyna Uayt bilan suhbatdan keyin Nyu-York politsiyasining 78-bo‘limiga ko‘ngilli tarzda kelgan. Makgregor politsiya bo‘limidan sud binosigacha kishanlangan holda yetkazilgan. 

Jangchiga pasportini topshirmaslikka ruxsat berilgan, shu sababli u Irlandiyaga qayta oladi. 

5 aprel kuni Makgregor bir necha sherigi bilan UFC 223 musobaqasida ishtirok etishi kerak bo‘lgan jangchilar avtobusiga hujum qilgan. Avtobusda yengil vazn toifasida chempionlik kamariga da'vogar rossiyalik Xabib Nurmagomedov ham bo‘lgan. Hujum oqibatida bir necha jangchilarga jarohat yetgan.

“Nyu-York post” nashrining ma'lum qilishicha, Makgregorning “quyushqondan chiqishiga” UFC rahbariyatining uni chempion unvonidan mahrum qilish qarori sabab bo‘lgan. Unga bezorilik va o‘zganing mulkiga ziyon yetkazish ayblovlari qo‘yilgan.