Tehronda O‘zbekiston-Eron hukumatlararo komissiyasining majlisi bo‘lib o‘tadi

O‘zbekiston Respublikasi bosh vaziri birinchi o‘rinbosari Ochilboy Ramatov boshchiligidagi delegatsiya 2018 yil 9-10 aprel kunlari Tehron shahrida bo‘lib o‘tadigan Savdo-iqtisodiy va ilmiy-texnik hamkorlik bo‘yicha O‘zbekiston-Eron hukumatlararo komissiyasining 12-majlisida ishtirok etadi. Bu haqda TIV axborot xizmati xabar qilmoqda.

Muzokaralar davomida savdo-iqtisodiy va ilmiy-texnikaviy sohalarda ikki tomonlama hamkorlikning holati hamda istiqbollari muhokama qilinadi. Xususan, ikki mamlakat o‘rtasidagi tovar ayirboshlash hajmini oshirish, transport-kommunikatsiya sohasidagi hamkorlikni yanada rivojlantirish, ikki mamlakatning tranzit imkoniyatlaridan faol va o‘zaro manfaatli foydalanishni ta'minlash masalalari tilga olinadi.

Eslatib o‘tamiz, savdo-iqtisodiy va ilmiy-texnikaviy hamkorlik bo‘yicha O‘zbekiston-Eron hukumatlararo komissiyasining avvalgi, 11-majlisi 2015 yil aprel oyida Toshkent shahrida bo‘lib o‘tgan.