Bekzod Tursunboyev professional boksdagi debyutini ajoyib g‘alaba bilan boshladi

«O‘zbekiston» sport majmuasida bo‘lib o‘tayotgan boks kechasining ikkinchi jangida farg‘onalik Bekzod Tursunboyev o‘zining professional boksdagi dastlabki jangini o‘tkazdi.

Unga indoneziyalik tajribali bokschi, professional boksda 40 jang o‘tkazib, 29 g‘alaba, 8 mag‘lubiyat, 3 durang qayd etgan Roy Muxlis raqiblik qildi.

Tursunboyevning professional boksdagi debyuti 2 daqiqa, 52 soniya davom etdi. Raqib jigar qismidan o‘tkazib yuborilgan og‘ir zarbadan so‘ng jangni davom ettira olmadi. Natijada Bekzod Tursunboyev texnik nokaut bilan g‘alaba qozondi.