Ukraina Rossiyaga qarshi yangi sanksiyalar joriy qildi

Ukraina prezidenti Pyotr Poroshenko rossiyalik qator jismoniy va yuridik shaxslarga qarshi yangi sanksiyalar joriy etilishini nazarda tutuvchi farmonni imzoladi. Bu haqda Poroshenko saytida xabar berilgan.

«Ukraina Milliy xavfsizlik va mudofaa kengashining 2018 yil 2 maydagi «Maxsus iqtisodiy va boshqa cheklov choralari (sanksiyalar)ni qo‘llash hamda bekor qilish to‘g‘risida»gi qarori harakatga keltirilsin», - deyiladi hujjatda.

Eslatib o‘tamiz, avvalroq Ukraina Xavfsizlik xizmati «Rossiya nazorati ostida bo‘lgan mediatuzilmalar» faoliyati fosh etilgani haqida xabar bergandi. Rossiya OAVdan «Ukrainaga qarshi gibridli axborot urushi»ni olib borish uchun foydalangani aytilgan.