O‘zbekiston va Tojikistonning uchta shahri o‘rtasida xalqaro avtobus yo‘nalishlari ochildi

9 sentabr kuni Tojikistonda davlat mustaqilligining 27 yilligi keng nishonlanadi. Ushbu sana munosabati bilan ikki davlat xalqlariga qulaylik yaratish maqsadida bugun, 8 centyabrdan boshlab “Termiz-Dushanbe”, “Denov-Dushanbe”, “Samarqand-Panjikent” yo‘nalishida xalqaro avtobuslar qatnovi yo‘lga qo‘yildi. Bu haqda “Xalq so‘zi“ga xabar berdi.

“Termiz-Dushanbe” xalqaro avtobus yo‘nalishining masofasi 251 km bo‘lib qatnovga sarflanadigan umumiy vaqt 5 soat-u 39 daqiqani tashkil etadi. Yo‘lkira haqi tashuvchilar tomonidan Termizdan Dushanbegacha - 70 ming so‘m. Dushanbedan-Termizgacha esa 70 somoniy qilib belgilandi.

Yo‘nalish masofasi 107 km. bo‘lgan “Denov-Dushanbe” xalqaro avtobus yo‘nalishida yo‘lovchilar 2 soat 25 daqiqada o‘z manziliga yetkaziladi. Yo‘lkira haqi tashuvchilar tomonidan Denovdan Dushanbegacha 40 ming so‘m. Dushanbedan Denovgacha esa 40 somoniy etib belgilandi.

“Samarqand-Panjikent” xalqaro avtobus yo‘nalishining masofasi 64 km. Qatnovga sarflanadigan umumiy vaqt 1 soat-u 25 daqiqa bo‘lib, yo‘lkira haqi tashuvchilar tomonidan Samarqanddan Panjikentgacha 20 ming so‘m. Panjikentdan Samarqandgacha esa 20 somoniy qilib belgilandi.