Jizzax viloyatida avtobus YTHga uchradi

Jizzax viloyati Paxtakor tumanida 17 aprel kuni avtobus yo‘l-transport hodisasiga uchrashi oqibatida yo‘lovchilar jarohatlandi. Bu haqda viloyat YHXB axborot xizmati xabar berdi.

Hodisa Toshkent–Termiz M-39 avtomobil yo‘lining 957-kilometrida juma kuni soat 06:45 da sodir bo‘lgan.

Ma’lum qilinishicha, Nukus–Olmaota yo‘nalishida harakatlanib ketayotgan yo‘lovchi avtobusi haydovchisi boshqaruv vaqtida hushyorlikni yo‘qotgan. Oqibatda transport vositasi yo‘lning ta’mirlash ishlari olib borilayotgan qismidagi yo‘lni ajratuvchi beton to‘siqqa borib urilgan.

YTH oqibatida tan jarohati olgan fuqarolarga birlamchi tibbiy yordam ko‘rsatilgan. Mazkur holat yuzasidan Jizzax viloyati IIB tergov boshqarmasi tomonidan tergovga qadar tekshiruv harakatlari olib borilmoqda.