Turkiya ta'lim jamg‘armasi Qirg‘izistonda o‘z ishini boshlaydi 

Turkiya ta'lim jamg‘armasi (TMV)  yaqin orada Qirg‘izistonda o‘z ishini boshlaydi. Bu haqda Turkiyaning Bishkekdagi elchisi Chingiz Komil Firat ma'lum qildi.

Firat Turkiya prezidenti Rajab Toyyib Erdo‘g‘anning Qirg‘izistonga 3 kunlik tashrifi bo‘yicha matbuot anjuman o‘tkazgan. Uning anjumanda aytishicha, Anqara va Bishkekning munosabatlari ikki turkiyzabon davlat o‘rtasidagi hamkorlikni yanada chuqurlashtirishga imkon beruvchi yangi bosqichga o‘tmoqda.

Firat ta'lim jamg‘armasi Qirg‘izistondagi faoliyatining 1-bosqichida Bishkekda o‘z maktabini ochishini ma'lum qilgan.

“Biz Turkiya ta'lim jamg‘armasi maktablari kelgusida Qirg‘izistonning barcha hududlarida faoliyat yuritishini istaymiz. Rejalarda yangi ta'lim muassasalarini ochish hamda Sebat maktablari tarmog‘i asosida ta'lim jarayonini kengaytirishni tashkillashtirish bor”, deb aytgan Firat.

Turkiya elchisi turk maktablari Qirg‘iziston ta'lim vazirligi dasturlarini hisobga olgan holda faoliyat yuritishini qo‘shimcha qilgan.