Germaniya neft tanqisligiga duch keldi

Germaniya ba'zi federal yerlarni yonilg‘i bilan ta'minlash uchun neftning strategik zaxirasidan foydalanishga majbur bo‘lmoqda. Bu haqda Germaniya iqtisodiyot vaziri ma'lum qildi.

Muammo qurg‘oqchil yoz sababli yuzaga kelgan. Buning oqibatida Germaniyaning bosh daryosi Reynda suv sathi pasaygan. Daryo shunchalik sayozlashib ketganki, neft tankerlari to‘liq yuklanganda u orqali o‘tolmay qolgan.

Strategik zaxiradan 84 ming tonna benzin, 180 ming tonna dizel yoqilg‘isi va 67 ming tonna aviatsion kerosin olinadi. Hukumatning bayonotiga ko‘ra, gap uzoq davom etuvchi inqiroz haqida ketmay, strategik zaxiradan yonilg‘ini faqat ba'zi yerlargina oladi. 

Germaniya strategik zaxirasida 24 mln tonna neft xomashyosi va neft mahsulotlari saqlanadi. Bu zaxira evaziga favqulodda vaziyatda 90 kun davomida avtotransport ishi, havo tashuvlari va kimyo sanoati uchun xomashyo yetkazib berilishini ta'minlash mumkin.

Mamlakatda ushbu zaxira 40 yil avval to‘plana boshlangan. Shu vaqt ichida undan 3 martagina foydalanilgan: Iroqdagi urush, Liviyadagi inqiroz va AQShdagi “Katrina” dovuli vaqtida.