Shota Arveladze: «Murabbiylik faoliyatimdagi ilk finalda jamoani boshqaraman»

O‘zbekiston Kubogi finalidan o‘rin olgan OKMK - «Paxtakor» o‘yinidan oldin, toshkentliklar ustozi Shota Arveladze va yarimhimoyachisi Sherzod A'zamov matbuot anjumanida ishtirok etib, o‘z fikrlari bilan o‘rtoqlashishdi.

«Final bir o‘yindan iborat va undagi xatoni tuzatib bo‘lmaydi. Finalgacha ishonch bilan yetib keldik. Uni ijobiy yakunlashni xohlaymiz. Raqib kuchli, oxirigacha kurashadigan jamoa. Lekin biz 7 yillik tanaffusdan so‘ng ushbu sovrinni yutishni istaymiz

Ertaga murabbiylik faoliyatimda birinchi finalda jamoani boshqaraman. Bunday o‘yinlar hamisha yoqimli. Raqib himoyada yaxshi o‘ynaydi, standart vaziyatlardan foydalanishga urinadi. Lekin biz kuchli jihatlarimizni namoyish etishga intilamiz», - dedi Shota Arveladze.

«Finalda jiddiy raqib bilan to‘qnashamiz. Ular safida mahoratli o‘yinchilar bor. Biz esa faqat g‘alaba uchun maydonga tushamiz. Kubokni qo‘lga kiritishni xohlaymiz. Jamoa bilan mashg‘ulotlarda ishtirok etdim, hozir yaxshi holatdaman», - dedi Sherzod A'zamov.

OKMK - «Paxtakor» o‘yini Farg‘onadagi «Istiqlol» stadionida 28 oktabr kuni soat 15:00da boshlanadi.