Yevropa Ittifoqi umumiy razvedka maktabini tashkil etish loyihasini ma'qulladi

Yevropa Ittifoqiga a'zo davlatlar mudofaa vazirlari Bryusseldagi yig‘ilishda umumiy razvedka maktabini (JEIS) tashkil etish loyihasini ma'qullashdi.

“JEIS YeI davlatlari, NATOning kontrrazvedka sohasidagi ilg‘or tajriba markazi, milliy razvedka va xavfsizlik xizmatlari bilan birgalikda YeI davlatlari razvedka personaliga razvedka va boshqa aniq sohalar bo‘yicha bilim berish va tayyorlashni amalga oshiradi”, deyilgan xabarda.

Loyihada Buyuk Britaniya, Daniya va Maltadan tashqari, YeIga a'zo 28 ta davlatdan 25 tasi ishtirok etadi.

YeIning umumiy razvedka maktabini tashkil etish hamjamiyat davlatlarining mudofaa va xavfsizlik sohasidagi doimiy hamkorligi doirasidagi loyihalardan biri hisoblanadi.

Noyabr boshida Fransiya prezidenti Emmanuel Makron AQShdan mustaqil bo‘lgan “umumevropa armiyasini” tashkil etish g‘oyasini bildirgandi.  

O‘tgan hafta esa Germaniya kansleri Angela Merkel Yevropa xavfsizlik kengashini tashkil etish taklifini berdi. Merkel ham umumiy armiya tashkil etish g‘oyasini qo‘llab-quvvatlagan. Uning aytishicha, bunday armiya butun dunyoga Yevropa davlatlari o‘rtasida yangi urush bo‘lishi mumkinmasligini ko‘rsatgan bo‘lardi.