Abdulaziz Komilov Avstriya elchisi bilan nimalarni muhokama qildi?

2018 yilning 18 dekabr kuni O‘zbekiston Respublikasi tashqi ishlar vaziri Abdulaziz Komilov Avstriya Respublikasining favqulodda va muxtor elchisi (qarorgohi Vena shahrida) etib tayinlangan Alois Krautni qabul qildi.

TIV xabariga ko‘ra, vazir elchining ishonch yorliqlarini qabul qilar ekan, uni mas'uliyatli lavozimga tayinlangani bilan tabrikladi va muvaffaqiyatlar tilagan.

Suhbat chog‘ida hamkorlikning deyarli barcha sohalarida ikki tomonlama aloqalarning jadal va izchil tus olgani qayd etildi, deyiladi xabarda.

Abdulaziz Komilov Avstriyaning 31 dekabr kuni yakunlanayotgan Yevropa ittifoqidagi muvaffaqiyatli raisligini alohida qayd etdi.

Uchrashuvda ikki mamlakat ishbilarmon doiralari vakillari o‘rtasida to‘g‘ridan-to‘g‘ri aloqalarni kengaytirish, jumladan tashriflar almashish va qo‘shma biznes-forumlarini o‘tkazishdan tomonlar manfaatdorligi tasdiqlandi.

Ta'kidlanganidek, tomonlar madaniy-gumanitar hamkorlikka katta e'tibor qaratmoqda. Shu o‘rinda Toshkent iqtisodiyot universitetida Avstriya amaliy fanlar universiteti bilan hamkorlikda ilg‘or dasturlar bo‘yicha mutaxassislar tayyorlashi rejalashtirilayotgan mintaqamizdagi ilk fakultet ochilishi muhim voqea hisoblanadi.

Qayd etilishicha, suhbat chog‘ida ayrim xalqaro siyosiy masalalar muhokama qilingan.