Avstriyada sobiq razvedka xodimi RF uchun josuslikda ayblanmoqda

Avstriyaning sobiq razvedka xodimi Egisto Ott Rossiya foydasiga josuslik qilganlikda aybdor deb topilib, Vena sudi tomonidan to‘rt yil-u bir oylik qamoq jazosiga hukm qilindi. U ayblovlarni rad etib, o‘zini aybsiz deb hisoblamoqda.

Foto: Reuters

Sud hay’ati 63 yoshli Egisto Ottning 2015–2022 yillar davomida maxfiy ma’lumotlarni Rossiya tomoniga yetkazganini isbotlangan deb topdi. U Avstriyaning tugatilgan Federal konstitutsiyani himoya qilish va terrorizmga qarshi kurash boshqarmasi (BVT)ning sobiq xodimi hisoblanadi.

Tergov ma’lumotlariga ko‘ra, Ott Wirecard kompaniyasining sobiq top-menejeri Yan Marsalek bilan hamkorlik qilgan. Marsalek 2020 yilda Rossiyaga qochib ketgan va xalqaro qidiruvga berilgan.

Hukm hozircha kuchga kirmagan. Chunki Egisto Ott sud zalining o‘zidayoq apellyatsiya bergan. U AFP agentligiga bergan intervyusida hech qachon Rossiya maxsus xizmatlariga ma’lumot uzatmaganini va barcha harakatlari qonun hamda rahbariyat ko‘rsatmalari doirasida bo‘lganini aytgan.

Prokuratura versiyasiga ko‘ra, Ott Yevropa ma’lumot bazalaridan foydalanib, Rossiyadan qochib chiqqan fuqarolar, jurnalistlar va sobiq razvedka xodimlari haqida ma’lumot to‘plagan. Shuningdek, u Italiya va Buyuk Britaniyaga “qo‘llab-quvvatlash so‘rovlari” yuborgani aytilmoqda.

Ayblov tomoni Ott Avstriya Ichki ishlar vazirligining bir nechta yuqori lavozimli amaldorlariga tegishli mobil telefonlarni Moskvaga yetkazganini ham ma’lum qildi. Bu orqali Rossiya minglab aloqalarga kirish imkoniga ega bo‘lgani va Avstriyada yashayotgan ukrain hamda chechen qochqinlarining xavfsizligi xavf ostida qolgani ta’kidlanmoqda.

AFP agentligining yozishicha, avstriyalik tergovchilar Ottni 2019 yilda Berlinda chechen qo‘mondoni Zelimxan Xonqoshvilining o‘ldirilishi bilan bog‘lovchi hujjatni ham topishgan. Qotillik Rossiya agenti Vadim Krasikov tomonidan amalga oshirilgani aytilgan.

Prokuratura mazkur hujjatni “Yevropa Ittifoqi hududida kelgusida muvaffaqiyatli suiqasdlar uyushtirish bo‘yicha qo‘llanma” deb atagan. Dpa agentligi ma’lumotiga ko‘ra, Xonqoshvili o‘ldirilganidan va Krasikov qo‘lga olinganidan ikki hafta o‘tib, Ott operatsiyadagi xatolar tahlili hamda razvedka ma’lumotlariga asoslangan qotilliklar bo‘yicha tavsiyalar tayyorlagan.

Prokurorning ta’kidlashicha, ushbu hisobot Avstriya hukumatining topshirig‘i bilan tayyorlanmagan, chunki “Avstriya xorijda odam o‘ldirish bo‘yicha topshiriq bermaydi”.