5 mart kuni O‘zbekiston Respublikasi Energetika vazirligi hamda "Buyuk kelajak" XNNT o‘rtasida Anglashuv memorandumi imzolandi. Hujjat Energetika vaziri Alisher Sultonov va "Buyuk kelajak" XNNT ijrochi direktori vazifasini bajaruvchi Zuhra Azimova tomonidan imzolandi, deya xabar berdi vazirlik matbuot xizmati.
Tomonlar hamkorlik doirasida qo‘shma ekspert guruhini tuzishga, mamlakatning energetika sohasini qayta isloh qilishga va uning intensiv rivojlanishiga ta'sir ko‘rsata olishi mumkin bo‘lgan loyihalarni muhokama qilish va taklif qilishga kelishib olishdi.
Memorandumga muvofiq, tomonlar xorijiy mamlakatlarning ilg‘or tajribasini inobatga olgan holda, O‘zbekiston energetika sektorini intensiv rivojantirishni rejalashtirishmoqda. Mamlakat yoqilg‘i-energetika kompleksi ustuvor yo‘nalishlarini rivojlantirish, elektroenergiya va neft-gaz sohasini isloh qilish, zamonaviy texnologiyalarni qo‘llab qayta tiklanuvchi energiya manbalari va infratuzilma obektlarini qurish kabilar shular jumlasidandir.
Hujjatga ko‘ra, tomonlar ta'lim seminarlarini tashkillashtirishi, muzokaralar o‘tkazish uchun yetakchi mutaxassislarni jalb qilishi, loyihalar bo‘yicha qarorlar qabul qilishi bo‘yicha hamkorlik qilishi mumkinligi ko‘zda tutilgan.
