Turkiya va Eron 18 mart kuni Kurdiston ishchi partiyasi (KIP) a'zolariga qarshi birinchi marta birgalikda aksilterrorchilik operatsiyasi o‘tkazdi. Bu haqda Turkiya ichki ishlar vaziri Sulaymon Soylu ma'lum qildi.
“Bugun ertalabki soat 8 dan boshlab birinchi marta Eron bilan birgalikda operatsiya o‘tkazmoqdamiz”, deb ma'lum qilgan Soylu.
“Anadolu” axborot agentligining xabar berishicha, Anqara va Tehronning KIPga qarshi qaratilgan operatsiyasi davomiy ko‘rinishga ega. Birgalikdagi harakatlar turk-eron chegarasida olib borilmoqda. “Operatsiya natijalari haqida keyinroq e'lon qilamiz”, deb aytgan Soylu.
KIP 1984 yildan beri Turkiyaning asosan kurdlar yashaydigan janubi-sharqiy hududlariga mustaqillik berilishi uchun kurashib keladi. Turkiya va Eronda KIP terrorchilik tashkiloti deb hisoblanadi.
