O‘zbekistonda Colin’s va Levi’s brendidagi jinsilar ishlab chiqarilishi mumkin

14 iyunda Olmaliqda Vintage Denim qo‘shma korxonasi o‘z ishini boshladi, deb xabar berdi “O‘zbekto‘qimachiliksanoati” uyushmasi matbuot xizmati.  

Matbuot xizmati ma'lumotlariga ko‘ra, korxonada jinsidan kiyimlar ishlab chiqarish uchun 130 ta tikuv mashinasi va boshqa yuqori texnologik qurilma o‘rnatilgan. Korxonaning ishlab chiqarish quvvati oyiga 150 mingdan ko‘proq jinsi shim va jyemperga teng.

Ta'kidlanishicha, fabrika ish boshlagandan beri 250 dan ko‘proq odam doimiy ish bilan ta'minlangan. “Korxona nafaqat jinsi shim, balki jyemperlar ham ishlab chiqaradi. Jinsi mahsulotlarga narxlar import mahsulotlarga nisbatan raqobatbardosh bo‘ladi. Mahsulotning bir qismi eksport qilinadi”, deyilgan uyushma xabarida.  

Shuningdek, korxona xorijning yetakchi jinsi brendlari Colin’s, Levi’s va LC Waikiki bilan mahsulot ishlab chiqarish bo‘yicha muzokaralar olib borayotgani ma'lum qilindi. Ayni vaqtda korxona De facto brendi bilan hamkorlik qilmoqda.