KXDR AQSh bilan muloqot borasidagi «umidlar so‘nayotganini» ma'lum qildi

Shimoliy Koreya va AQSh o‘rtasidagi muloqotni yangilash borasidagi umidlar so‘nmoqda, deyiladi KXDR tashqi ishlar vaziri o‘rinbosari Tsoy Son Xining bayonotida.

AQSh davlat kotibi Mayk Pompeoning KXDRning «bezoriliklari» to‘g‘risidagi jumlasiga Shimoliy Koreya ana shunday javob qaytardi. Tsoy Son Xining bildirishicha, amerikalik amaldorning so‘zlari ikki mamlakat o‘rtasida rejalashtirilgan muzokaralar o‘tkazilishini murakkablashtirgan va KXDR aholisining salbiy munosabatiga sabab bo‘lgan.

«AQSh bilan muloqot borasidagi umidlarimiz borgan sari so‘nib bormoqda va bizni ilgari zimmamizga olgan majburiyatlarni qayta ko‘rib chiqishga undamoqda», — deyiladi bayonotda.

O‘tgan haftada KXDR tashqi ishlar vaziri Li Yon Xo Pompeoning Pxenyanga nisbatan sanksiyalar to‘g‘risidagi so‘zlari uchun tanqid qilgan va uni AQSh diplomatiyasining «zaharli o‘simligi» deb atagandi.